PERSONA NGA GINAHUNONG, NAPATAY MATAPOS MALIPONG

Igapaidalom sa autopsy ang bangkay sang isa ka priso nga napatay samtang nahunong sa karsel sang La Paz PNP.

Ginkilala ang biktima kay Jose Verde sang distrito sang Molo.

Nadakpan sang Security Guard kag mga bystander si Verde sa Brgy. Laguda, La Paz syudad sang Iloilo matapos magsulod sa isa ka building kag nagkuha sang mga flat bar.

Luyag nga hibaluon ni P/CInsp. Uldarico Garbanzos, hepe sang La Paz PNP, kon sa diin nakastiguhan ang priso.

Nahibaluan nga hinali na gid lamang nalipong sa sulod sang karsel sang nagligad nga gab-i si Jose Verde kag gindeklarar sang doktor sa West Visayas State University Medical Center (WVSUMC) nga dead on arrival.

//rmn newsroom/mesoy

GINTIRO SAMTANG NAGASIPILYO, PATAY

Patay si Vic Secuya Sr., 32-anyos, kag pumuluyo sang San Geronimo, Barotac Viejo, Iloilo matapos luthangon sang iya bilas nga si Rene Balasan samtang naga-toothbrush.

Patal nga pilas sa likod sang ulo ang naagum sang biktima nga gintunaan sang iya gilayon nga kamatayon.

Daan nga hiligut-anon kag ang pagmina-oy sang suspetsado nga si Rene Balasan ang rason sang pagluntad sang krimen.

Gilayon man nga nagsungka sa Brgy. Tanod ang suspetsado kag karon nahunong sa karsel sang Btac. Viejo PNP Station.

//rmn newsroom/mesoy

SUNOG NGA NANGHALIT, POSIBLE TUGA SANG SHORT CIRCUIT

Short circuit ang ginalantaw nga kawsa sang sunog nga nagluntad kaina sang aga sa opisina sang Asset, Credit and Loans Incorporated nga nahamtang sa Jesena Building 4 nga nahamtang sa Lopez-Jaena sa distrito Jaro sa syudad sang Iloilo.

Ginpahayag ni SFO2 Antonio Patiño, ang arson investigator sang Bureau of Fire Protection, nga wala ginadula ang posibilidad nga ang water pump nga nagaandar bisan wala na sang tubig nga ginahigop ang rason sang pagluntad sang sunog.

Natupok sang kalayo ang mga re-possess nga appliances, collateral sa mga loan kag pila pa ka mga papeles.

//rmn newsroom/mesoy